خبریں

کرناٹک میں بی جے پی کی حکومت بننا طے،اکثریت ثابت کرنے کے لیے ملا ایک ہفتے کا وقت

کانگریس  کا کہنا ہے کہ بی جے پی ایک سازش کے تحت حکومت بنانے کا دعویٰ کر رہی ہے جبکہ اکثریت کانگریس ،جے ڈی ایس اتحاد کے پا س ہے۔

فوٹو: پی ٹی آئی

فوٹو: پی ٹی آئی

نئی دہلی:کرناٹک اسمبلی الیکشن کے نتائج میں  کسی بھی پارٹی کو واضح اکثریت نہ ملنے کی وجہ سے پورے معاملے نے ڈرامائی شکل اختیار کر نے کے بعد بی جے پی کی حکومت بننا تقریباً طے ہوگیا ہے ۔این ڈی ٹی وی کے مطابق گورنر نے بی جے پی کو حکومت بنانے کے لیے مدعو کیا ہے اور اکثریت ثابت کر نے کے لیے ایک ہفتے کا وقت دیا ہے۔

واضح ہو کہ بی جے پی کو سب سے بڑی پارٹی کے طور پر 104 سیٹوں پر جیت ملی ہے جبکہ کانگریس کو 78 اور جے ڈی ایس نے38 سیٹوں پر کامیابی حاصل کی ہے۔اس کے علاوہ آزاد امیدوار اور ’دیگر‘ کے حصے میں 2 سیٹیں آئی ہیں ۔ 224 سیٹوں والی ریاستی اسمبلی کے 222 سیٹوں پر ہوئے انتخابات کے نتائج آئے ہیں اور 2سیٹوں پر ابھی انتخاب ہونا باقی ہے۔

غور طلب ہے کہ شروعاتی رجحان کے بعد ہی کانگریس نے یہ واضح کر دیا تھا کہ  وہ جے ڈی ایس کو اپنی حمایت دینے کے لیے تیار ہے ،جس کے بعد جے ڈی ایس کی طرف سے بھی بیان آیا کہ وہ کانگریس کے ساتھ حکومت بنانے کو تیار ہیں ۔کانگریس نے یہ بھی صاف کر دیا ہے کہ وہ جے ڈی ایس کے کمار سوامی کو وزیر اعلیٰ بنا نا چاہتے ہیں ۔

دریں اثنا بی جے پی نے جہاں سب سےبڑی پارٹی کے طور پر گورنر سے ملاقات کر کے حکومت بنانے کا دعویٰ پیش کیا تھا وہیں جے ڈی ایس اور کانگریس کے لیڈروں نے بھی بعد میں گورنر سے ملاقات کی  تھی۔جے ڈی ایس کو کانگریس کی حمایت کی خبر کے بعد  بی جے پی کے وزیر اعلیٰ  کے امیدوار یدورپا نے الزام لگاتے ہوئےکہا تھا کہ کانگریس،عوام کی جانب سے مسترد کئے جانے کے باوجود اقتدار پرقبضہ کرنا چاہتی ہے۔

کانگریس کے ترجمان رندیپ سرجے والا کا کہنا ہے کہ بی جے پی ایک سازش کے تحت حکومت بنانے کا دعویٰ کر رہی ہے جبکہ اکثریت کانگریس ،جے ڈی ایس اتحاد کے پا س ہے۔ایک سوال کے جواب میں انہوں نے کہا کہ جہاں تک سب سے بڑی پارٹی کو حکومت بنانے کے لیے مدعو کرنے کی بات ہے توگوا میں کانگریس سب سے بڑی پارٹی کے طور پر ابھری لیکن اس کے باوجود بی جے پی نے حکومت بنالی تھی۔

کہاجارہا ہے کہ  بی جے پی کو حکومت بنانے کی دعوت کے بعد ایم ایل اے کے خرید و فروخت کا کھیل  کھیلا جا سکتا ہے ۔ اس درمیان کئی معروف سیاسی اور سماجی شخصیتیں اس سلسلے میں کہہ رہی ہیں کہ گورنر کو کانگریس اور جے ڈی ایس کو حکومت بنانے کے لیے بلانا چاہیے ۔حالاں کہ کچھ سیاسی مبصرین کا یہ بھی کہنا ہے کہ کانگریس کو اپوزیشن میں بیٹھنا چاہیے۔

پارٹی کی کارکردگی اور کامیابی کے لیے وزیر اعظم نریندر مودی نے مبارکباد پیش کی ہے۔