راج کوٹ کے شاپر انڈسٹریل علاقہ میں ایک کارخانہ کے باہر کچرا چن رہے جوڑے کو بےرحمی سے پیٹا گیا، جس کے بعد شوہر کی موت ہو گئی اور بیوی شدیدطور پر زخمی ہے۔
نئی دہلی : ایک دلت آدمی کو راج کوٹ کے شاپر انڈسٹریل علاقہ میں ایک کارخانہ کے باہر کارخانہ کے مالک اور ملازمین کے ذریعے باندھکر بری طرح سے پیٹا گیا، جس کے بعد اس کی موت ہو گئی۔یہ واقعہ اتوار کی صبح کا ہے۔ احمد آباد مرر کی خبر کے مطابق مرنے والے آدمی کا نام مکیش ساؤجی ونیا ہے، جو اپنی بیوی کے ساتھ کچرا چننے کا کام کیا کرتا تھا۔پولیس کے مطابق مکیش اپنی بیوی جیا اور ایک دوسری عورت کے ساتھ راددیا انڈسٹریز کے احاطے میں کچرا چن رہے تھے، جب ان پر حملہ کیا گیا۔
پولیس میں درج کروائی شکایت کے مطابق، جیا نے بتایا کہ حملہ آوروں نے پہلے دونوں خواتین کو بیلٹ سے مارا، جس کے بعد وہ مدد کے لئے بھاگی۔ اس کے بعد ان لوگوں نے مکیش کو کارخانہ کے دروازے پر باندھکر بری طرح سے پیٹا۔جب تک خواتین اور لوگوں کے ساتھ لوٹیں، حملہ آور مکیش کو پیٹتے رہے۔ اس کے بعد مکیش کو راج کوٹ سول ہسپتال لے جایا گیا، جہاں اس کی موت کا اعلان کر دیا گیا۔
این ڈی ٹی وی کے مطابق، پولیس نے کارخانہ کے مالک سمیت5 لوگوں کو حراست میں لیا ہے اور ان پر قتل اور ایس سی ایس ٹی ایکٹ کا معاملہ درج کیا ہے۔ راج کوٹ پولیس کے سینئر پولیس افسر شروتی میہتا نے بتایا، ‘ ہم نے کارخانہ کے مالک سمیت 5 لوگوں کو گرفتار کیا ہے۔ ان کے نام ابھی شیئر نہیں کئے جا سکتے کیونکہ ایف آئی آر میں ان کے نام نہیں دئے گئے ہیں۔ ان لوگوں پر قتل اور ایس سی ایس ٹی ایکٹ کے تحت معاملہ درج کیا گیا ہے، جس کی تفتیش ڈپٹی رینک کے افسر کے ذریعے کی جائےگی۔ ‘
مکیش کو پیٹے جانے کی کوئی واضح وجہ سامنے نہیں آئی ہے۔ بتایا جا رہا ہے کہ ان لوگوں کو چوری کرنے کے شک میں پیٹا گیا، لیکن پولیس نے نہ اس بات کی تصدیق کی ہے اور نہ ہی اس سے انکار کیا ہے۔میڈیا میں آئی خبروں کے مطابق مرنے والے کے رشتہ دار پوسٹ مارٹم ہاؤس کے سامنے دھرنے پر بیٹھے ہوئے ہیں۔
'Mr. Mukesh Vaniya belonging to a scheduled caste was miserably thrashed and murdered by factory owners in Rajkot and his wife was brutally beaten up'.#GujaratIsNotSafe4Dalit pic.twitter.com/ffJfn7rNSc
— Jignesh Mevani (@jigneshmevani80) May 20, 2018
مکیش کو پیٹے جانے کا ویڈیو سوشل میڈیا پر سامنے آیا ہے، جس میں دو لوگ ان کو بےرحمی سے مارتے ہوئے دکھائی دے رہے ہیں۔وڑگام سے ایم ایل اے جگنیش میوانی نے اس ویڈیو کو سوشل میڈیا پر شیئر کرتے ہوئے لکھا ہے کہ یہ اونا میں دلتوں پر ہوئے حملے سے بھی زیادہ خطرناک ہے۔ گجرات دلتوں کے لئے محفوظ نہیں ہے۔ حکومت نے اپنی پچھلی غلطیوں سے کچھ نہیں سیکھا۔
Categories: خبریں