خبریں

نارتھ ایسٹ میں سیلاب : تریپورہ میں 4 اور منی پور میں 2 لوگ ہلاک

نارتھ ایسٹ میں عام زندگی متاثر ،گزشتہ 48گھنٹوں میں 6 لوگوں کے ہلاک ہونے کی اطلاع ۔ریاستی حکومت نے مرکز سے مانگی مدد۔

فوٹو: پی ٹی آئی

فوٹو: پی ٹی آئی

نئی دہلی :ایک طرف جہاں ملک کے کئی حصے گرمی کی آگ میں جھلس رہے ہیں وہیں نارتھ ایسٹ میں بارش نے قہر برپا کیا ہے۔ذرائع کے مطابق سیلاب کی وجہ سے کئی علاقوں میں لوگ اپنا گھر چھوڑنے کو مجبو رہوئے ہیں ۔تقریباً 1.5لاکھ لوگ آسام میں جبکہ 40000لوگ تریپورہ میں سیلاب سے متاثر ہوئے ہیں۔آسام میں لمڈنگ بادر پور ہل سیکشن میں بھاری بارش کی وجہ سے زمین دھنس گئی ،اس کے پیش نظر 4 ٹرینوں کو رد کر دیا گیا ہے۔حالاں کہ کوئی پسنجر ٹرین متاثر نہیں ہوئی ہے اور مرمت کا کام چل رہا ہے۔

این ڈی ٹی وی کی ایک خبر کے مطابق؛گزشتہ 48 گھنٹوں میں تریپورہ میں 4 جبکہ منی پور میں دو لوگوں کے ہلاک ہونے کی اطلاع ہے۔

تریپورہ میں سیلاب کے سنگین حالات کی وجہ سے وزیر اعلیٰ بپلب دیب نے مرکز سے مدد مانگی ہے۔وزیر اعلی ٰ نے وزیر داخلہ راج ناتھ سنگھ سے سیلاب کے بارے میں بات کرتے ہوئے مرکزی حکومت سے فوج کی مدد مانگی ہے۔انہوں نے ریاست میں این ڈی آر ایف کی ٹیمیں بھیجنے کی گزارش بھی کی ہے ۔مسلسل بارش کی وجہ سے نارتھ ایسٹ کے کئی علاقے سیلاب کی زد میں آگئے ہیں۔

محکمہ موسمیات نے تریپورہ اور آسام میں بھاری بارش کی پیشن گوئی کی تھی،جس کے بعد الرٹ جاری کیا گیا تھا۔ریاست میں 3941بچوں سمیت 10000لوگوں نے 71راحت کیمپوں میں پناہ لی ہوئی ہے۔Assam Disaster Management Authorityکے افسروں نے بتایا کہ 1127.72ہیکٹر کھیتی کی زمین پانی میں ڈوب گئی ہے۔کٹکھل ندی بدھ کو ہیلا کانڈی میں خطرے کے نشان سے اوپر بہہ رہی تھی ۔کریم گنج سے 124لوگوں کو بچایا گیا ہے۔

دریں اثنا تریپورہ سی ایم او کے ٹوئٹر ہینڈل سے یہ جانکاری دی گئی ہے کہ تریپورہ میں میں 189راحتی کیمپ میں 25000لوگوں نے پناہ لی ہے۔

منی پور میں ریاستی حکومت نے بدھ کو تمام افسروں کے ساتھ اکیڈمک انسٹی ٹیوشن میں چھٹی کا اعلان کر دیا ہے ۔غور طلب ہے کہ اس سے پہلے انفال ویسٹ اور ایسٹ میں تین دنوں سے سیلاب ب نے قہر برپا کیا ہے۔