خبریں

مہاراشٹر: بارش سے 27 لوگوں کی موت، منگل کو پبلک ہالی ڈے کا اعلان

ان میں سے 18 لوگوں کی موت بھاری بارش کی وجہ سے ممبئی کے  ملاڈ میں ایک دیوار گرنے سے ہو گئی۔ حادثے میں 50 سے زیادہ لوگ زخمی بھی ہوئے ہیں۔

(فوٹو : بہ شکریہ اے این آئی)

(فوٹو : بہ شکریہ اے این آئی)

نئی دہلی: بھاری  بارش کی وجہ سے ممبئی میں دیوار گرنے کے  علاوہ مہاراشٹر میں ہوئے مختلف واقعات میں 27 لوگوں کی موت ہوئی ہے۔ ان میں سے 18 لوگوں کی موت بھاری بارش کی وجہ سے ممبئی کے ملاڈ میں ایک دیوار گرنے سے ہو گئی۔ حادثے میں 50 سے زیادہ لوگ زخمی بھی ہوئے ہیں۔افسروں نے بتایا کہ سوموار رات پونے کے امبےگاؤں  میں ایک تعلیمی ادارے کی دیوار اس کے پاس بنی عارضی جھوپڑی پر گرنے سے چھے مزدوروں کی موت ہو گئی۔ وہیں منگل کی صبح ٹھانے ضلع کے کلیان میں ایک دیوار گرنے سے تین لوگوں کی جان چلی گئی۔

خراب موسم کی وجہ سے  ممبئی کے ‘ چھترپتی شیواجی انٹر نیشنل ایئر پورٹ ‘ پر 54 ہوائی جہازوں کے راستے بدلے گئے اور 52 اڑانیں رد کر دی گئیں۔ہوائی اڈے کے ایک ترجمان نے بتایا کہ موسلادھار بارش کی وجہ سے جئے پور سے آ رہا ‘ اسپائس جیٹ ‘ کا ایک ہوائی جہاز ممبئی ہوائی اڈے کے مین رن وے سے پھسلتے ہوئے اس سے نیچے اتر گیا۔ حالانکہ، حادثہ میں کوئی ہلاک نہیں ہوا ہے۔

این ڈی آر ایف کے افسروں نے بتایا کہ دیر رات تقریباً دو بجے مشرقی ملاڈ علاقے کے پمپری پاڑہ واقع ایک کیمپس  کی دیوار گر گئی اور پاس کی جھگیوں میں رہنے والے لوگ اس کی زد میں آ گئے۔این ڈی آر ایف کے ایک سینئر افسر نے بتایا، ‘ واقعہ کی جانکاری ملنے کے بعد  ہماری ٹیم شوان دستہ کے ساتھ فوراً جائے واردات پر پہنچی۔ اس کے علاوہ دمکل محکمہ کی ایک ٹیم اور مقامی پولیس بھی حالات کو قابو میں کرنے کے لئے موقع پر موجود ہے۔ ‘

لوکل باڈی کے افسر نے بتایا کہ زخمیوں کو ‘ جوگیشوری ٹراما ہاسپٹل ‘ اور کاندولی کے ‘ شتابدی ہاسپٹل ‘ میں بھرتی کرایا گیا ہے۔ کلیان میں ہوئے حادثے میں درگاڈی قلعہ کے پیچھے ایک اردو اسکول کی دیوار دیر رات تقریباً ایک بجے گرگئی، جس میں تین لوگوں کی جان چلی گئی۔نیوی کے افسر نے بتایا کہ کرلا میں این ڈی آر ایف، نیوی  اور دمکل محکمہ نے ایک مشترکہ مہم میں تقریباً 1000 لوگوں کو وہاں سے  نکال‌کر محفوظ مقام پر پہنچایا۔

اس بیچ، لوکل باڈی کے ایک افسر نے کہا، ‘ ہندوستانی  محکمہ موسمیات کے ذریعے موسلادھار بارش کی پیشین گوئی کے بعد مہاراشٹر حکومت نے ممبئی اور اس کے لوگوں کی حفاظت کے لئے احتیاطی طور پر دو جولائی کو پبلک ہالی ڈے کا اعلان کر دیا ہے۔ ‘وسطی  ریلوے نے پٹریوں پر پانی بھرنے کی وجہ سے کچھ ہی راستوں پر ٹرین چلانے کا فیصلہ کیا ہے۔

وسط ریلوے کے چیف ترجمان سنیل اداسی نے کہا کہ آر پی ایف کے جوانوں کی مدد سے وسط ریلوے نے آدھی رات کو چلنے والی ٹرین (لوکل) میں پھنسے ہزاروں مسافروں کو نکالا اور کئی اسٹیشنوں پر چائے، بسکٹ اور دیگر خوردنی اشیا بھی بانٹے۔وسط ریلوے کے افسر نے بتایا کہ بھاری بارش کی وجہ سے وسط اور مغربی ریلوے نے لمبی دوری کی 20 سے زیادہ ٹرینیں یا تو رد کر دی ہیں یا پھر ان کو ممبئی سے باہر اسٹیشنوں پر ہی روک دیا ہے۔

بجلی کمپنیوں نے بھی احتیاط کے طور پر ممبئی کے کچھ نواحی علاقوں میں بجلی کی سپلائی روک دی ہے۔موسلادھار بارش کی وجہ سے مہاراشٹر کے وزیراعلیٰ دیویندر فڈنویس کو بھی ایم ایل اے کے لئے ایک نئی عمارت کی تعمیر کی بنیاد رکھنے کے پروگرام کو ردکرنا پڑا۔ممبئی یونیورسٹی کے امتحانات بھی ملتوی کر دیے گئے ہیں۔ ساتھ ہی ایم بی بی ایس، بی ڈی  ایس اور بی اے ایف ایس میں داخلے کے لیے اسٹوڈنٹس کو اب 5 جولائی تک کا وقت دے دیا گیا ہے۔

(خبر رساں ایجنسی بھاشا کے ان پٹ کے ساتھ)