خبریں

کورونا وائرس انفیکشن کے معاملے 11 دن میں ہو رہے ہیں دوگنے، موت کی شرح 3.2 فیصد: وزارت صحت

وزارت صحت  کے جوائنٹ سکریٹری  لو اگروال نے کہا کہ موت کے 14 فیصدی  معاملے 45 سال کی عمر  سے کم کے ہیں، 34.8 فیصدی معاملے 45-60 سال کی عمر کے مریضوں کے ہیں اور 51.2 فیصدی  موت  کے معاملے 60 سال سے زیادہ عمر کے لوگوں کے ہیں۔

علامتی تصویر ، فوٹو: رائٹرس

علامتی تصویر ، فوٹو: رائٹرس

نئی دہلی: ملک میں کووڈ 19 کے معاملے دوگنے ہونے کی شرح11 دن ہو گئی ہے۔ لاک ڈاؤن شروع ہونے سے پہلے یہ شرح3.4 دن تھی۔ وہیں انفیکشن سے موت کے معاملوں کی شرح 3.2 فیصدی ہے۔ وزارت صحت نے یہ جانکاری دی۔وزارت صحت کے جوائنٹ سکریٹری  لو اگروال نے ایک پریس بریفنگ کو خطاب کرتے ہوئے کہا کہ دہلی، اتر پردیش، جموں وکشمیر، اڑیسہ، راجستھان، تمل ناڈو اور پنجاب میں معاملوں کی تعداد دوگنی ہونے کی شرح 11-20 دن ہے۔

انہوں نے کہا کہ کرناٹک، لداخ، ہریانہ، اتراکھنڈ اور کیرل میں معاملوں کی تعداد20 سے 40 دن میں دوگنی ہو رہی ہے۔انہوں نے کہا کہ دہلی (11.3)،اتر پردیش (12)،جموں کشمیر (12.2)،اڑیسہ (13)، راجستھان (17.8)، تمل ناڈو (19.1) اور پنجاب (19.5) میں معاملوں کی تعداد دوگنی ہونے کی شرح 11-20 دن ہے۔

ان کے مطابق، کرناٹک (21.6)،لداخ (24.2)،ہریانہ (24.4)،اتراکھنڈ (30.3) اور کیرل (37.5) میں معاملوں کی تعداد 20 سے 40 دن میں دوگنی ہو رہی ہے۔اگروال نے کہا کہ پچھلے 24 گھنٹے میں کووڈ 19 کے 1718 نئے معاملے سامنے آئے ہیں اور ملک میں اب تک انفیکشن کے کل معاملوں کی تعداد33000 سے زیادہ  پر پہنچ گئی ہے۔ ملک میں کو رونا وائرس انفیکشن سے موت کی شرح3.2 فیصد ہے جہاں مرنے والوں  میں 65 فیصدی مرد اور 35 فیصدی خاتون  ہیں۔

حکام نے کہا، ‘اگر ہم عمر  کی بنیاد پرتعداد کوتقسیم  کریں تو موت کے 14 فیصدی  معاملے 45 سال کی عمر سے کم کے ہیں،34.8 فیصدی معاملے 45-60 سال کی عمر کے مریضوں  کے ہیں اور 51.2 فیصدی موت کے معاملے 60 سال سے زیادہ عمر کے لوگوں کے ہیں۔’اگروال نے کہا کہ کووڈ 19 سے مریضوں کے ٹھیک ہونے کی شرح میں  بھی اصلاح ہوئی ہے اور پچھلے 14 دن میں یہ 13.06 فیصدی  سے 25 فیصدی سے زیادہ ہو گئی ہے۔ 8324 مریض  اب تک ٹھیک ہو چکے ہیں جو مریضوں کے کل معاملوں کا 25.19 فیصدی ہے۔

(خبررساں ایجنسی بھاشا کے ان پٹ کے ساتھ)