کرناٹک کے وزیر داخلہ پریانک کھڑگے نے واضح کیا کہ ان کا مقصد آر ایس ایس پر پابندی لگانے کی تجویز پیش کرنا نہیں، بلکہ اس کے کام کاج میں مکمل شفافیت کو یقینی بنانا ہے۔ اس سے قبل انہوں نے سنگھ کے چیف کو خط لکھ کر تنظیم کی قانونی حیثیت، مالی وسائل اور تنظیم سے متعلق دیگر تفصیلات عوام کے سامنے لانے کی اپیل کی تھی۔
کرناٹک کے وزیر داخلہ پریانک کھڑگے نے آر ایس ایس چیف موہن بھاگوت کو خط لکھ کر کہا کہ ہندوستان اور بیرون ملک 60,000 سے زائد شاکھاؤں اور کروڑوں سویم سیوکوں کا دعویٰ کرنے والی اتنی بڑی تنظیم کو شفافیت، جوابدہی اور آئینی تعمیل کے اعلیٰ ترین معیارات پر کھرا اترنا چاہیے۔
آر ایس ایس چیف موہن بھاگوت نے دعویٰ کیا تھا کہ تنظیم کو باقاعدہ رجسٹریشن کی ضرورت نہیں ہے۔ موجودہ قانونی دفعات کے تحت اسے چھوٹ حاصل ہے۔ کرناٹک کے وزیر داخلہ پریانک کھڑگے نے کہا کہ جس ملک میں ہر ٹھیلہ -پھیری لگانے والے کو بھی رجسٹریشن کرانا پڑتا ہے، وہاں آر ایس ایس جیسی تنظیم قانون سے اوپر کیسے ہو سکتی ہے؟ وہ دکھائیں کہ انہیں آئین کی دفعات سے کس طرح استثنیٰ حاصل ہے۔