شمال مشرقی دہلی کے حالیہ تشدد میں کھجوری خاص علاقے میں رہنے والے بی ایس ایف جوان محمد انیس کا گھر بھی شرپسندوں نے جلا دیا تھا۔ اڑیسہ میں پوسٹیڈ محمد انیس کے گھر کی تعمیرنو میں اب بی ایس ایف مدد کرےگی۔
بی ایس ایف جوان محمد انیس کا گھر (فوٹو: دی وائر)
نئی دہلی: قومی راجدھانی دہلی کے شمال مشرقی علاقوں میں پچھلے ایک ہفتے میں جو فسادات ہوئے، اس میں کھجوری خاص کا علاقہ بھی شامل تھا۔ 25 فروری کو کھجوری خاص کے گلی نمبر پانچ میں فسادیوں نے جن تقریباً 40 مکانوں کو نشانہ بنایا، ان میں بی ایس ایف کے ایک جوان محمد انیس کا گھر بھی شامل تھا۔انیس کی پوسٹنگ فی الحال اڑیسہ میں ہے۔ واقعہ کی جانکاری ملنے کے بعد حال ہی میں وہ گھر لوٹے ہیں۔ ان کی فیملی میں کل آٹھ لوگ ہیں، جو واقعہ کے دوران گھر میں ہی تھے۔
دی وائر کی ٹیم 27 فروری کو انیس کے گھر پہنچی۔ ان کے محلے میں سناٹا چھایا ہوا تھا۔ گلی کے زیادہ تر گھر جلکر خاک ہو گئے تھے، گلی ملبہ سے پٹی ہوئی تھی۔
گلی میں کھڑی تمام گاڑیاں جلا دی گئی ہیں۔ گھر جلکر خاک ہونے کی وجہ سے انیس کی گلی کے سبھی لوگ سامنے والی گلی میں ایک عارضی جگہ پر شفٹ ہو گئے ہیں۔ پیٹرول بم اور سلنڈر بلاسٹ کی وجہ سے انیس کے گھر کی چھت گر چکی ہے، گھر کے باہر ملبے کا ڈھیر ہے۔
گھر میں داخل ہوتے ہی دکھائی دیتا ہے کہ سارا سامان جلکر خاک ہو چکا ہے۔ پھر چاہے وہ باورچی خانہ کا سامان ہو یا فرنیچر۔ سامنے کے کمرے میں ایک جلا ہوا بیڈ ملا، جس سے رہ-رہکر ابھی بھی دھنواں نکل رہا تھا۔ تپش اور جلنے کی بو صاف محسوس کی جا سکتی تھی۔
انیس کی فیملی کے لوگ ابھی بھی ڈرے ہوئے ہیں۔پہلی منزل پر پہنچنے پر ہمیں جلے ہوئے سامان کا ڈھیر ملا، پوچھنے پر انیس کے والد نے بتایا کہ یہ ان کی بیٹی کی شادی کا سامان تھا۔ انیس اور ان کی بہن کی اسی سال شادی ہونی ہے۔ایسی صورتحال میں بی ایس ایف ان کی فیملی کی مدد کے لئے آگے آیا ہے۔ بی ایس ایف ان کے گھر کی تعمیرنو میں تعاون کرےگا اور انہوں نے مالی تعاون کا بھی وعدہ کیا ہے۔
محمد انیس کے چچا زاد بھائی گل شیر نے دی وائر کو بتایا، ‘ ماحول بگڑنے کی خبر کے ساتھ ہی ہم نے گھر سے نکلنا بند کر دیا تھا۔ 25 فروری کی رات تقریباً 500 سے زیادہ شرپسندوں کی بھیڑ جئےشری رام کے نعرے لگاتے ہوئے پیٹرول بم، اسلحہ-بارود کے ساتھ ہماری گلی میں گھسی اور گلی میں کھڑی تمام گاڑیوں کو آگ لگا دی۔ بھیڑ نے پتھراؤ کرنا شروع کر دیا۔ ہم بھیڑ سے بچنے کے لئے چھت پر چلے گئے۔ فسادی پیٹرول بم جلاکر چھتوں پر پھینکنے لگے۔ ‘
انیس کے والد محمد مونس نے بتایا، ‘ میں نے زندگی میں کبھی نہیں سوچا تھا کہ ایسا ماحول دیکھنے کو ملےگا۔ ہم لوگ گھر میں پھنس گئے تھے، اگر فورس نہیں آتی تو ہم بچ نہیں پاتے۔ فسادیوں کی بھیڑ پاکستانیوں باہر نکلو، ملک کے غداروں کو ،گولی مارو سالوں کو اور جئے شری رام کے نعرے لگا رہی تھی۔ ‘
Categories: خبریں, گراؤنڈ رپورٹ