بک ریویو : ایک کتاب جو دلت پینتھر کی تاریخ بتاتی ہے

دلت پینتھر کن حالات میں وجود میں آیا، اور اس کی کیا سرگرمیاں رہی تھیں، یہ جاننا بےحد دلچسپ ہوگا۔ اس کتاب کے مصنف جے۔ وی۔ پوار دلت پینتھر کے بانیوں میں ہیں۔

مہاراشٹر کے دلت آندولن اور ادب میں جے۔ وی۔ پوار ایک اہم دستخط مانے جاتے ہیں۔ ان کی اہمیت کا اندازہ اسی سے لگایا جا سکتا ہے کہ ڈاکٹر  آنند تیلتومڑے انہیں مابعد امبیڈکر دلت آندولن کا ‘ انسائکلوپیڈیا ‘اور بھاؤ تورسیکر آمبیڈکرآندولن کا ‘ گوگل ‘ کہتے ہیں۔ اس لئے ایسے اہم مصنف کی ‘دلت پینتھر کی دستاویزی تاریخ ‘ پر لکھی گئی کتاب کو پڑھا جانا یقیناً ایک نئے تجربے سے گزرنا ہے۔ یہ جے۔ وی۔ پوار کی مراٹھی کتاب ‘ دلت پینتھر ‘ کا انگریزی ترجمہ ہے، جو ‘ Dalit Panthers : An Authoritative History ‘ نام سے رکشت سوناونے نے کیا ہے۔ اس ضروری تاریخ کی اشاعت ‘ فارورڈ پریس بکس ‘ اور ‘ دی مارجنلائزڈ پبلی کیشن ‘ نئی دلّی نے مل‌کر کی ہے۔ اس اہم اشاعت کے لئے پرمود رنجن اور سنجیو چندن دونوں شکریے کے حقدار ہیں۔

‘ دلت پینتھر ‘اسّی کی دہائی کا وہ انقلابی احتجاج تھا، جس نے مہاراشٹر کے دلتوں کو ہی نہیں، بلکہ وہاں کی سیاست کو بھی متاثر کیا تھا۔ اسی دلت پینتھر کے بطن سے مراٹھی دلت ادب کا جنم ہوا تھا۔ اس سے پہلے دلت لفظ کا وجود تو تھا، پر وہ رواج میں نہیں آیا تھا۔ اس انقلابی تنظیم کی تشکیل29 مئی 1972 کو ہوئی تھی۔ لیکن اس نے لمبی عمر نہیں پائی۔ اور پانچ سال بعد 7 مارچ 1977 کو ہی اس کو ختم کر دیا گیا۔

دلت پینتھر کن حالات میں وجود میں آیا، اور اس کی کیا سرگرمیاں رہی تھیں، یہ جاننا بےحد دلچسپ ہوگا۔ اس کتاب کے مصنف جے۔ وی۔ پوار دلت پینتھر کے بانیوں میں ہیں۔ انہوں نے اپنی کتاب میں ‘ دلت پینتھر ‘ کے پس منظر پر جو باب لکھا ہے، اس کے مطابق ستّر کی دہائی مہاراشٹر میں دلتوں پر بےحد غیر انسانی مظالم کا دور تھا۔ ری پبلکن پارٹی (آر۔ پی۔) کے رہنما آپس میں لڑ رہے تھے۔ ظلم کرنے والوں کے خلاف کوئی کارروائی نہیں ہو رہی تھی، جس سے ان کے حوصلے بلند ہوتے جا رہے تھے۔ ظلم حدود پار‌کر رہا تھا۔ دلت عورتوں کے ساتھ آبروریزی، ان کو ننگا گھمانے، دلتوں کا سماجی بائیکاٹ کرنے، ان کے کنواں میں انسانی پاخانہ ڈالنے، پیٹ پیٹ‌کر مارنے، قتل کرنے، زندہ جلانے، گھروں کو جلانے، ان کی زمینوں پر قبضہ کرنے، اور شمشان کی زمین پر چتا نہ جلانے دینے کے واقعات بڑھتے ہی جا رہے تھے۔ یہ واقعات دلتوں کے غصے کو بڑھا رہے تھے۔

ممبئی میں 14اپریل 1972 کو دلت بستی چنچواڑی (باندرا) میں ڈاکٹر امبیڈکر کےیوم پیدائش کے پروگرام میں لاؤڈاسپیکر کی آواز کو لےکر وہاں کے اعلیٰ ذات کے لوگوں نے پولیس میں شکایت کی، جس سے پولیس کو دلتوں پر حملہ کرنے کا موقع مل گیا۔ پی ایس آئی ناناوارے کی پولیس ٹیم نے نہ صرف وہاں جاکر دلتوں کو مارا پیٹا، بلکہ باباصاحب ڈاکٹر امبیڈکر اور بدھ کی تصویریں بھی پھاڑ دیں۔ یہ خبر جنگل کی آگ کی طرح پورے ممبئی شہر میں پھیل گئی۔ جلد ہی کثیر تعداد میں لوگ مخالفت کرنے کے لئے باندرا پولیس اسٹیشن پہنچ گئے۔ پورے ممبئی شہر میں دلتوں کے مظاہرے ہوئے۔ 16 اپریل 1972 کو ڈاکٹر امبیڈکر کے فرزند بھیا صاحب امبیڈکر نے وزارت کے سامنے مظاہرہ کی قیادت کی۔ مظاہرین نے باندرا واقعہ کی تفتیش اور قصوروار پولیس افسر کو معطل کرنے کی مانگ کی۔ بیرسٹر بی۔ ڈی۔ کامبلے اور بھاؤصاحب کیلشیکر نے بھی الگ سے ایک مارچ کی قیادت کی اور پولیس افسر کی معطلی کی مانگ کی۔ دونوں مظاہرہ کے رہنماؤں نے اس وقت کے ریاستی وزیر ڈی۔ ٹی۔ روپاوٹے کو اطلاع دی۔ مگر، جے۔ وی۔ پوار کے مطابق، کوئی کارروائی نہیں ہوئی۔

وہ آگے لکھتے ہیں کہ اسی وقت آر پی آئی کئی حصوں میں منقسم ہو گئی تھی۔ وجہ کچھ بھی ہو، مگر اقتدار میں جانے کا لالچ ا س کے مرکز میں تھا۔ 14اپریل 1972 کو چیتہ بھومی ممبئی میں امبیڈکر کے یوم پیدائش پر بولتے ہوئے کہا کہ وہ آر پی آئی کے کچھ رہنماؤں کو اقتدار کے لالچ میں پارٹی چھوڑ‌کر کانگریس میں جانے سے نہیں روک پائے۔

اسی وقت شیوسینا کے ایم ایل اے وامن راؤ مہادک نے باندرا کے واقعہ پر ایک جلسہ منعقد کیا، جس میں منوہر جوشی اور اداکارہ وجینتی مالا کے شوہر ڈاکٹر چمن لال بالی بھی شامل ہوئے تھے۔ اس جلسہ میں آر پی آئی کی تنقید ہوئی، جس نے کچھ ان دلت جوانوں کو زیادہ متاثر کیا، جو شیوسینا کے حامی تھے۔ انہوں نے ممبئی کے کماٹھی پورہ علاقے میں شیوسینا کے طرز پر ‘ بھیم سینا ‘ کی تشکیل کی۔ اس کی پہلی مجلس پدمشالی کمیونٹی ہال میں ہوئی، جس میں شانتارام ادھنگلے، کملیش سنتوجی گایکواڑ، نارائن گایکواڑ، سیتارام مثال، بی۔ آر۔ کامبلے، وشنو گایکواڑ، وی۔ ایس۔ اسوارے، ایس۔ ار۔ جادھو اور ٹی۔ ڈی۔ یادو وغیرہ کچھ اہم لوگوں نے بھیم سینا پر گفتگو کی۔ وہ ا س کے نام سے تو متّفق تھے، لیکن اس نام سے ایک تنظیم پہلے سے ہی حیدر آباد میں تھی۔ آخر کارانہوں نے بھیم سینا کے بجائے آر پی آئی کے دلت رہنماؤں کو سبق سکھانے کے لئے ‘ ری پبلکن کرانتی دل ‘ نام رکھ دیا۔ مضمون نگار لکھتے ہیں کہ دلتوں کو شیوسینا میں جانے سے روکنے کے لئے یہ تنظیم بھی مقصد کو پورا نہیں کر رہی تھی۔ اس لئے اس کا پھر سے نام بدل‌کر ‘ ری پبلکن ایکئ کرانتی دل ‘ کیا گیا۔ مضمون نگار کے مطابق اس نئی جماعت کے کچھ رہنما بھی لالچ میں آکر  اپنے مقصدسے الگ ہو گئے۔

Photo : DalitHistory.com

مصنف لکھتے ہیں کہ یہی وہ وقت ہے، جب دلت مضمون قلمکاروں نے دادر میں صلاح  و مشورہ کے لئے اجلاس کرنا شروع کیا۔ دلت مصنفوں کے یہ اجلاس دادر میں ایرانی ریستوراں میں ہوتے تھے۔ یہ مصنف تھے دیا پوار، ارجن ڈانگلے، نامدیو ڈھسال، پرہلاد چیندوانکر اور خود مضمون نگار جے۔ وی۔ پوار۔ یہ اندرا گاندھی کی استبدادی حکومت، کانگریسی رہنماؤں کی غنڈہ گردی اور دلتوں پر بڑھتے مظالم کا دور تھا۔ ساتھ ہی یووک کرانتی دل، رپبلکن کرانتی دل، یووک اگھاڈی، سماجوادی یووک سبھااور مسلم ستیشودھک سمیتی کا بھی دور تھا۔ ‘ دلت پینتھر ‘ کا جنم اسی پس منظر میں ہوا تھا۔

دلت پینتھر کی تشکیل

دلت پینتھر کی تشکیل کے پیچھے ‘ الایاپیرومل کمیٹی ‘ کی رپورٹ کا بھی بڑا ہاتھ تھا۔ اس بارے میں جے۔ وی۔ پوار بتاتے ہیں کہ 1965 میں پورے ملک میں دلت ذاتوں پر ہو رہے مظالم کے معاملوں کا مطالعہ کرکے ان کو دور کرنے کا حل سجھانے کے لئے رکن پارلیامنٹ ایل۔ الایاپیرمل کی صدارت میں ایک کمیٹی کی تشکیل کی گئی تھی۔ اس کمیٹی نے دلت پر ظلم وستم کے تقریباً 11 ہزار معاملوں کا مطالعہ کرکے 30 جنوری 1970 کو اپنی رپورٹ حکومت کو سونپی تھی۔ اس نے اپنی رپورٹ میں کہا تھا کہ دلتوں کو انصاف مہیّا کرانے میں اندرا حکومت کی پوری طرح ناکامی سامنے آئی ہے۔ لیکن حکومت نے اس رپورٹ کو ایوان کے میز پر رکھنے میں کوئی دلچسپی نہیں لی۔ اس کی وجہ یہ تھی کہ دلتوں پر ظلم کرنے والے مجرم بنیادی طور پر کانگریسی، برہمن اورغیربرہمن ہی تھے۔ اس رپورٹ نے نوجوانوں کے ذہن میں سماجی تبدیلی کی چنگاری سلگا دی تھی۔ حالانکہ مختلف جماعتوں میں منقسم ری پبلکن رہنما اس مدعے پر خاموش تھے۔ لیکن نو جوان مصنف اور شاعر چاہتے تھے کہ حکومت اس معاملے میں کارروائی کرے۔ اس وقت دادر کے ایک ایرانی ریستوراں میں دیا پوار، ارجن ڈانگلے، نامدیو ڈھسال، پرہلاد چیندوانکر اور جے۔ وی۔ پوار وغیرہ کچھ دلت قلمکار بیٹھ‌کر بات چیت کیا کرتے تھے۔ یہ ان کے بیٹھنے کا باقاعدہ اڈہ تھا۔ ایک دن ان سب نے طے کیا کہ ‘ الایاپیرمل کمیٹی ‘ کی رپورٹ پر حکومت کو خبردار کرنے کے لئے ایک عوامی بیان جاری کرنا چاہیے۔ اس تجویز پر 12 دلت قلمکاروں نے دستخط کئے۔ بابوراو باگل نے دستخط کرنے سے انکار کر دیا تھا۔ دیا پوار سرکاری ملازم ہونے کے ناطے سروس کی شرائط سے بندھے ہوئے تھے۔ پرہلاد چیندوانکر، جیسا کہ جے۔ وی۔ پوار نے لکھا ہے، ڈھل مل قسم کے تھے، اور بھروسہ مند نہیں تھے۔ آخرکار، راجا ڈھالے، نامدیو ڈھسال، ارجن ڈانگلے، بھیم راو شرولے، شنکر رندھیر، گنگادھر پانتاونے، وامن نمبالکر، موریشور واہنے اور جے۔ وی۔ پوار کے دستخط سے ایک عوامی بیان پریس کو جاری کیا گیا۔ مضمون نگار نے انکشاف کیا ہے کہ جس وجہ سے بابوراو باگل اور دیا پوار دستخط کرنے سے ڈر رہے تھے، وہ یہ سطریں تھیں ‘ اگر حکومت دلتوں پر ناانصافی اور ظلم روکنے میں ناکام ہوتی ہے، تو ہم قانون کو اپنے ہاتھوں میں لے لیں‌گے، ‘ ان کو لگتا تھا کہ پولیس یہ پڑھ‌کر پتا لگا لے‌گی کہ بیان مصنفوں کی طرف سے آیا ہے، اور وہ ان کو پکڑ لے‌گی۔ ان کے دستخط نہ کرنے کی یہی ایک وجہ تھی۔

اسی وقت مہاراشٹر میں دلت ظلم وستم کے دو واردات اور ہوئیں۔ ایک، پونے میں باودا گاؤں میں پوری دلت آبادی کا سماجی بائیکاٹ کر دیا گیا تھا۔ یہ بائیکاٹ اس وقت کے وزیر مملکت شنکرراو پاٹل کے بھائی شاہجی راو پاٹل نے کروایا تھا۔ دوسرا واقعہ پربھانی ضلع کے برہمن گاو ں میں ہوا تھا، جہاں ایک دلت خاتون کو ننگا کرکے اس کو ببول کی ٹہنیوں سے مارتے ہوئے گھمایا گیا تھا۔ ان واقعات کی کئی تنظیموں نے مذمت کی تھی۔ 28 مئی کو جوان ‘ اگھادی سنگٹھن’ کے رہنماؤں نے وزیراعلیٰ وسنت راؤ نائک سے مل‌کر ان کو اطلاع دی، جس میں انہوں نے مانگ کی کہ ان واقعات کی عدالتی تفتیش کرائی جائے اور قصورواروں کو سزا دلائی جائے۔ وزیراعلیٰ نے الٹے دلت رہنماؤں کو ہی صلاح دی کہ وہ خود ان واقعات کی جانچ کرکے حکومت کو رپورٹ دیں۔ لیکن تنظیم کے رہنماؤں نے یہ کہہ‌کر اس مشورہ کو ماننے سے انکار کر دیا کہ یہ ان کا کام نہیں ہے، یہ کام حکومت کو کرنا چاہیے، کیونکہ اس کے پاس ساری مشینری اور خفیہ نظام ہے۔ لیکن حکومت نے کچھ نہیں کیا۔

The Dalit Panthers : an Authoritative History: J.V.PAWAR  |  Publisher : The Marginalized Publication, New Delhi

نامدیو ڈھسال اور جے وی پوار ایک ہی علاقے میں رہتے تھے۔ ڈھسال ڈھور چال میں اور پوار سدّھارتھ شہر کی میونسپلٹی کے کواٹروں میں۔ اس طرح وہ دونوں روز ہی ملا کرتے تھے۔ ایک دن سدّھارتھ وہار سے لوٹتے ہوئے ان دونوں کے دل میں خیال آیا کہ کیوں نہ دلتوں پر ظلم روکنے کے لئے ایک انڈرگراؤنڈتحریک چلائی جائے۔ ان کا منصوبہ جائے واردات پر جاکر فوراً مجرموں سے نمٹنے کا تھا۔ لیکن اس میں ان کے سامنے ایک رکاوٹ تھی۔ وہ جانتے تھے کہ ان کا سماج ایسے احتجاج کو تحفظ نہیں دے‌گا، اور یہ ان کے لئے الٹا پڑ جائے‌گا۔ لہذا : کافی غور ر فکر کرنے کے بعد انہوں نے یہ خیال چھوڑ دیا۔ جےوی پوار لکھتے ہیں کہ وہ ایم۔ اے۔ کے طالب علم تھے، مگر امبیڈکر تحریک کے لئے انہوں نے پڑھائی چھوڑ دی تھی۔

29 مئی 1972 کو ڈھسال اور جےوی پوار وٹھل بھائی پٹیل روڈ پر النکار سینما سے ہوتے ہوئے اوپیرا ہاؤس کے قریب ٹہلتے ہوئے دلت ظلم وستم کے خلاف ایک جھگڑالو تنظیم بنانے پر گفتگو کرتے ہوئے چل رہے تھے۔ وہ تنظیم کے لئے بہت سارے ناموں پر غور کر رہے تھے۔ پر بات نہیں بن رہی تھی۔ آخر کار : ان کا خیال ‘ دلت پینتھر ‘ پر جاکر مرکوز ہو گیا۔ اس طرح ممبئی کی ایک سڑک پر ٹہلتے ہوئے انقلابی تنظیم ‘ دلت پینتھر ‘ کا جنم ہوا۔ پوار لکھتے ہیں کہ پچھلے کچھ سالوں میں بہت سے لوگوں نے یہ دعویٰ کیا ہے کہ وہ دلت پینتھر کے بانی ہیں۔ لیکن سچ یہ ہے کہ اس تنظیم کا قیام صرف نامدیو ڈھسال اور جے وی پوار نے کیا تھا۔

اب اگلا قدم ‘ دلت پینتھر ‘ کو عام کرنے کا تھا۔ ڈھسال چونکہ سوشلسٹ تحریک سے جڑے تھے، اس لئے بہت سے لوگوں کو جانتے تھے۔ راجا رام موہن رائے روڈ پر سوشلسٹ کارکنوں کا دفتر تھا، جس میں رمیش سمرتھ نام کا ایک شاعر ٹائپنگ کا کام کرتا تھا۔ انہوں نے اس سے پریس کے لئے دلت پینتھر کے اعلان کا اشتہار ٹائپ کروایا۔ اس اشتہار پر سب سے پہلے دستخط ڈھسال نے کئے، اس کے بعد جےوی پوار نے۔ پھر کئی لوگوں نے دستخط کئے، جن میں راجا ڈھالے،  ارون کامبلے، دیانند مہسکے، رام داس اٹھاولے، اویناش مہاتیکر اہم ہیں۔ اشتہار میں لکھا گیا تھا ‘ مہاراشٹر میں نسل پرست ہندوؤں کو قانون کا ڈر نہیں رہ گیا ہے۔ امیر کسان اور اقتدار سے جڑے یہ اعلیٰ ذاتی ہندو دلتوں کے ساتھ گھناؤنے جرائم میں ملوث ہیں۔ ایسے غیر انسانی نسل پرستوں کو ٹھیک کرنے کے لئے ممبئی کے باغی نوجوانوں نے ایک نئی تنظیم ‘ دلت پینتھر ‘بنائی ہے۔ جےوی پوار، نامدیو ڈھسال، ارجن ڈانگلے، وجے گر‌کر، پرہلاد چیندونکر، رام داس سورتے، ماروتی سورتے، کوندیرام تھورات، اتم کھرات اور ارجن کسبے نے پوری ممبئی میں اس کی تشکیل کرنے کے لئے جلسے کیے ہیں، جن میں ہمیں بھاری حمایت ملی ہے۔ ‘

اس کے بعد دلت پینتھر کی انقلابی سرگرمیوں کا بیان کتابوں میں کیا گیا ہے، جس کو خواہشمند قاریوں کو ضرور پڑھنا چاہیے۔

دلت پینتھر کا زوال

جےوی پوار لکھتے ہیں، دلت پینتھر تنظیم پورے مہاراشٹر میں ایک مضبوط طاقت بن گئی تھی۔ اس سے جہاں ایک طرف حکومت پریشان تھی، وہیں دوسری طرف عام آدمی کو اس سے حفاظت اور راحت مل رہی تھی۔ وہ دلت پینتھر کی وجہ سے ڈر سے آزاد ہو گیا تھا۔ دلت پینتھر کے رہنماؤں کے ان کے ضلعوں میں قد بڑھ گیا تھا، جس کی وجہ سے ضلع کلکٹروں، پولیس کپتانوں، اہم افسروں اور عوامی نمائندوں کے ساتھ ان کی قربتیں بڑھ گئیں تھیں۔ اس کے نتیجے کے طور پر ان میں افسروں کے ذریعے کام کرانے کا رجحان شروع ہو گیا تھا۔

جےوی پوار لکھتے ہیں کہ دلت پینتھر کا جنم ناانصافی اور ظلم کو روکنے کے لئے ہوا تھا، لیکن اس نئے رجحان کی وجہ سے دلت پینتھر کے کچھ تعلقہ اور ضلع صدر خود بھی دلتوں کے ساتھ ناانصافی کرنے لگے تھے۔ پہلے دلت پینتھر زمین قبضہ‌کرنے کے معاملوں میں مداخلت کرکے جس کی زمین ہوتی تھی، اس کو واپس کراتے تھے۔ لیکن اب وہ ان زمینوں کی سودے بازی میں ملوث ہونے لگے تھے۔ پہلے وہ جھگیوں میں جاکر متاثر لوگوں کو تحفظ فراہم کرتے تھے، لیکن اب کچھ دلت پینتھر جھگیوں کے ہی مالک ہو گئے تھے، اور نئی جھگیوں کو بناکر ان کو بیچنے کا کام کرنے لگے تھے۔ ان سب کو دیکھ‌کر پوار اور ان کے دوستوں کو لگنے لگا تھا کہ دلت پینتھر کی جو امیج متاثرین کے محافظ کی بنی تھی، وہ بدل رہی تھی۔ بات یہاں تک بڑھ گئی تھی  کہ دلت پینتھر کے کچھ ممبروں نے شراب اسمگلر سے جبراً وصولی بھی کرنی شروع کر دی تھی اور خودہی ایسے ہی غیر قانونی دھندوں میں ملوث ہو گئے تھے۔ اس طرح کی سرگرمیوں سے عام آدمی نے دلت پینتھر کے خلاف بولنا شروع کر دیا تھا۔

پوار لکھتے ہیں کہ اگرچہ اس طرح کی سرگرمیاں بڑے پیمانے پر نہیں تھیں، مگر پھر بھی یہ اس بات کا ثبوت تھا کہ تنظیم میں ناپسندیدہ کام ہونے لگے تھے۔ ہر ضلع سے ایسے ایک-دو معاملوں کی شکایت آتی تھی۔ اس لئے پوار نے 10 جنوری 1976 کو ایک مجلس میں اس موضوع کو اٹھاتے ہوئے کہا کہ وہ تنظیم کی قیمت پر ڈاکٹر امبیڈکر کے فلسفہ سے سمجھوتہ نہیں کر سکتے۔ یہ کہہ‌کر انہوں نے دلت پینتھر کے مستقبل کو واضح کر دیا تھا۔

لیکن دلت پینتھر کے زوال کے لئے کچھ سیاسی حالات کا بھی پوار نے ذکر کیا ہے۔ یہ وہ وقت تھا، جب کانگریس کے خلاف ساری اپوزیشن پارٹیوں نے مل‌کر ‘ جنتا پارٹی ‘ بنائی تھی، اور ملک میں عام انتخابات کا اعلان ہو چکا تھا۔ پوار لکھتے ہیں کہ جنتا پارٹی کا اہم جزو جن سنگھ تھا۔ اس لئے کانگریس کو ہرانے کے لئے سنگھ پریوار [آر ایس ایس] نے ان انتخابات میں اپنی ساری طاقت جھونک دی تھی۔ اسی وقت پوار کو خبر ملی کہ جنتا پارٹی نے ناندیڑ سے راجا ڈھالے کو پارلیامنٹ کا ٹکٹ دیا ہے۔ راجا ڈھالے نے جیل میں بند جنتا پارٹی کے رہنماؤں کا موازنہ ایمرجنسی کے دوران جیل میں بھگوان کرشن کی پیدائش سے کیا تھا۔ پوار لکھتے ہیں کہ کانگریس پارٹی ہماری دشمن تھی، مگر ہم اس کی مختلف لڑائی میں جنتا پارٹی کی مدد کرنا نہیں چاہتے تھے۔ اسی وقت بھیاصاحب امبیڈکر پارلیامنٹ کے لئے بودھ پیروکاروں کے لئے ریزرویشن دلانے کے وعدے پر انتخاب لڑ رہے تھے۔ لیکن ان کے سارے دوست ان کو چھوڑ‌کر چلے گئے تھے۔ وہ اکیلے ہی بودھ کے پیروکار کے مدعے پر لڑ رہے تھے، جبکہ پورا ملک کانگریس کو گدی سے اتارنے کے لئے لڑ رہا تھا۔

جب جےوی پوار بھیاصاحب امبیڈکر کی حمایت کر رہے تھے، اس وقت نامدیو ڈھسال دلت پینتھر کے بینر تلے کانگریس کی تشہیر کر رہے تھے، جبکہ بھائی سنگارے اور اویناش مہاٹیکر جنتا پارٹی کی تشہیر کر رہے تھے۔ اس طرح دلت پینتھر کے تین الگ الگ گروپ ہو گئے تھے۔ پوار کہتے ہیں کہ یہی وہ حالتیں تھیں، جو ہم نے انتشار کو ختم کرنے کے لئے اور غلط کاموں میں ملوث دو گروپوں کے پیروں کے نیچے سے قالین کھینچنے کے لئے دلت پینتھر کو ختم کرنے کا فیصلہ کیا۔ بھیاصاحب امبیڈکر  نے ان کے اس خیال کی حمایت کی۔ اس کے بعد اس کا باضابطہ اعلان کے لئے ایک کتابچہ تیار کی گئی۔ یہ بک لیٹ رام داس اٹھاولے کے سدّھارتھ وہار ہاسٹل، وڈالا کے کمرے میں لکھی گئی۔ کمرے کو باہر سے لاک کرا دیا گیا، تاکہ کوئی اندر نہ آ سکے۔ کمرے میں صرف تین لوگ تھے ڈھالے، شنکر رندھیر اور جےوی پوار۔ اٹھاولے کو فٹ بال کھیلنے بھیج دیا گیا تھا۔ وہ اور ارون کامبلے جانتے تھے کہ کمرے میں کیا چل رہا ہے۔ ڈھالے بولتے گئے اور رندھیر لکھتے گئے۔ پوار نے ضرورت پڑنے پر لفظ بدلنے یا سدھارنے کا کام کیا۔ اس بک لیٹ کو راجا ڈھالے کی طرف سے ‘ بدھ اینڈ بھوشن پرنٹنگ پریس ‘، گوکلداس پاستا لین، دادر میں چھپوایا گیا۔

7 مارچ 1977 کو صحافیوں کو بک لیٹ کی کاپیاں جاری کی گئیں، اور باضابطہ اعلان کر دیا گیا کہ دلت پینتھر کو ختم کر دیا گیا ہے۔ اس پریس مذاکرہ میں اورنگ آباد سے گنگادھر گڈے بھی حاضر تھے اور انہوں نے صحافیوں کے دو سوالوں کے جواب بھی دئے تھے۔ بعد میں کچھ لوگوں نے ‘ پینتھر ‘ لفظ کو بھنانے کے لئے ایک نئی تنظیم ‘ اپن ماس پینتھر ‘ بنائی، پر وہ چلی نہیں۔

(بہ شکریہ ؛ میڈیا ویزل)