افسروں پر جوانوں سے’ووٹ کس کو دو‌گے‘پوچھنے کا الزام، لیہہ الیکشن کمیشن نے فوج کو لکھا خط

لیہہ کے ضلع الیکشن افسر نے 14 کارپس کے جنرل افسر کمانڈنگ کو خط لکھ‌کر گزارش کی ہے کہ فوج انتخابی کارروائی  کو لےکر سبھی کمانڈنگ افسروں کو بیدار کرے۔

آئی اے ایس افسر اونی لواسا(فوٹو: فیس بک)

نئی دہلی: جموں و کشمیر کے لیہہ میں فوج کے افسروں پر جوانوں سے ان کی ووٹنگ کو لےکر پسند کے بارے میں پوچھے جانے کی شکایت درج کرائی گئی ہے۔ اس معاملے کو اپنی  جانکاری لیتے ہوئے لیہہ کے ضلع الیکشن افسر اور ڈپٹی کمشنر اونی لواسا نے جمعہ کو لیہہ واقع 14 کارپس کے جنرل افسر کمانڈنگ کو ایک خط لکھا۔انڈین ایکسپریس کے مطابق، خط میں انہوں نے گزارش کی ہے کہ فوج انتخابی کارروائی کو لےکر سبھی کمانڈنگ افسروں کو بیدار کرے۔10 مئی کو بھیجے گئے خط میں لواسا نے کہا، ‘4-لداخ پارلیامانی حلقہ سے شکایت آئی ہے کہ الکٹرانک پوسٹل بیلٹ سسٹم کی کارروائی میں ہندوستانی فوج کے کئی کمانڈنگ افسر غیر مناسب طریقے اپنا رہے ہیں۔ ایسا الزام ہے کہ کمانڈنگ افسر ووٹنگ کرنے کے لئے جوانوں کو بیلٹ پیپر دینے کے بجائے ٹیلی فون کے ذریعے ان کی پسند پوچھ رہے ہیں۔ ‘

خط میں کہا گیا ہے کہ اس طرح کی کارروائی  کو رائے دہندگی کی پرائیویسی کی سنگین خلاف ورزی اور غیر اخلاقی مانا جائے‌گا جس پر سخت کارروائی ہو سکتی ہے۔انہوں نے لکھا،’یہ گزارش کی جاتی ہے کہ سبھی متعلقہ افسروں کو اس مدعے کو لےکر بیدار کیا جائے۔ ‘سرینگر واقع وزارتِ دفاع کے ترجمان کرنل راجیش کالیا نے کہا کہ کچھ امیدواروں نے جوانوں کا پوسٹر بیلٹ پروسس کو لےکر شکایت درج کرائی ہے۔ شکایت میں کسی خاص واقعہ کا ذکر نہیں کئے جانے کی وضاحت کرتے ہوئے انہوں نے کہا کہ شروعاتی جانچ سے پتہ چلتا ہے کہ شکایتں بے بنیاد ہیں اور فوج کی امیج کو خراب کرنے کے لئے رچی گئی ہیں۔

انہوں نے کہا،’معاملے کا ٹھیک ٹھیک پتہ لگانے کے لئے پوری غیرجانب داری کے ساتھ گہرائی سے جانچ کی جا رہی ہے۔ فوج ہمیشہ سے غیرسیاسی رہی ہے اور ہم ان قدروں  پر پوری طرح سے عمل کرتے ہیں۔ ‘ضلع الیکشن افسر کے دفتر سے جاری ایک بیان میں کہا گیا،’یہ شکایتں سجاد حسین اور اصغر علی کرولائی نے درج کرائی تھیں۔ دونوں ہی آزاد امیدوار ہیں۔ حالانکہ شکایت میں کسی خاص واقعہ کا ذکر نہیں کیا گیا۔ اس معاملے سے فوجی افسروں کو واقف کرا دیا گیا ہے۔ ‘لواسا نے اس خط کی ایک ایک کاپی ریاستی چیف الیکشن افسر شلین کابرا، لیہہ ایس ایس پی شرگن شلکا، کمانڈنگ افسر، ایل ایس آر سی 56 اے پی او کے ساتھ لداخ پارلیامانی حلقہ کے تمام امیدواروں کو بھیجی ہے۔

جمعرات کو لیہہ کے ضلع الیکشن افسر کے پاس شکایت درج کرانے والے لداخ سے امیدوار کربلائی نے کہا،’ہمیں کئی حلقوں سے شکایت ملی جس کے مطابق فوج کی کمپنی کمانڈرس ٹیلی فون کے ذریعے جوانوں سے ان کی ووٹنگ پسند پوچھ رہے تھے۔ یہ اصولوں کے خلاف ہے اور 2014 کی طرح ہی ایک خاص پارٹی کو فائدہ پہنچانے کے لئے کیا جا رہا ہے۔ ‘