پی این بی گھوٹالہ پر ’ چوکیدار ‘خاموش کیوں ہے : راہل گاندھی

کانگریس صدر راہل گاندھی نے اپنے بیان میں الزام لگایا کہ ہندوستان میں تمام ‘ چوروں ‘ نے اپنے کالے دھن  کو مودی کی مدد سے سفید کر دیا ہے۔

Photo: PTI

باگل کوٹ (کرناٹک) : کانگریس صدر راہل گاندھی نے وزیر اعظم پر نشانہ سادھتے ہوئے کہا کہ خود کو ملک کا ‘ چوکیدار ‘ بتانے والے نریندر مودی پی این بی گھوٹالہ معاملے پر ‘ خاموش ‘ کیوں ہیں۔راہل نے شمالی کرناٹک کے ویجاپورا اور اور باگل کوٹ ضلعوں میں پارٹی کی ریلیوں کے دوران اتوار کو مودی سے یہ بھی پوچھا کہ وہ بی جے پی صدر امت شاہ کے بیٹے جئے شاہ کی ایک کمپنی کے ٹرن اوور میں اچانک مبینہ اضافہ کے تعلق سے کوئی کارروائی کیوں نہیں کر رہے ہیں۔

انہوں نے کہا، ‘ مودی جی کرناٹک آتے ہیں اور بد عنوانی کے بارے میں بولتے ہیں۔  انہوں نے ملک سے ان کو (مودی) وزیر اعظم بنانے کے لئے نہیں کہا تھا بلکہ ملک کا چوکیدار بنانے کے لئے کہا تھا۔  ‘راہل نے کہا کہ ایک طرف ان کی پارٹی کے سابق وزیراعلیٰ (بی ایس یدیورپّا) اور بی جے پی حکومت کے چار دیگر سابق وزیر جیل گئے تھے اور مودی ان لوگوں کے درمیان بیٹھ‌کر بد عنوانی کے بارے میں بولتے ہیں۔کانگریس صدر نے الزام لگایا، ‘ امت شاہ کے بیٹے کی کمپنی کے ٹرن اوور میں تین مہینوں میں بےشمار اضافہ ہو جاتا ہے اور ملک کا چوکیدار اس کی تفتیش نہیں کراتا ہے اور اس پر ایک لفظ بھی نہیں بولتا ہے۔  ‘

راہل کرناٹک کے شمالی حصوں کے تین روزہ دورے پر ہیں۔  یہ ان کے ایک ہفتہ عشرے سے کم وقت میں ریاست کا دوسرا سفر ہے۔کرناٹک میں اگلے کچھ مہینوں میں اسمبلی انتخاب ہونے ہیں۔نوٹ بندی کے حوالے سے مودی پر نشانہ سادھتے ہوئے کانگریس صدر نے کہا، ‘ مودی جی نے بد عنوانی کے خلاف لڑائی میں ملک کو لائن میں (بینکوں کی لائنوں میں) کھڑے ہونے کے لئے کہا۔  آپ نے لائن میں ایک بھی امیر آدمی یا سوٹ-بوٹ پہنے ہوئے کسی آدمی کو نہیں دیکھا ہوگا۔  ‘

انہوں نے الزام لگایا کہ ہندوستان میں سبھی ‘ چوروں ‘ نے اپنے بلیک منی کو مودی کی مدد سے سفید کر لیاہے۔پنجاب نیشنل بینک (پی این بی) گھوٹالہ معاملے میں وزیر اعظم پر نشانہ سادھتے ہوئے راہل نے ان کی (مودی) خاموشی پر سوال اٹھائے۔  اس گھوٹالہ معاملے میں ہیرا کاروباری نیرو مودی اور ان کے ماموں اور زیورات کمپنی گیتانجلی کے میہل چوکسی شامل ہیں۔

کانگریس رہنما نے کہا، ‘ نیرو مودی 22 ہزار کروڑ روپے کی چوری میں شامل ہیں اور وہ ملک سے بھاگ جاتے ہیں لیکن اس ملک کا چوکیدار ایک لفظ بھی اس پر نہیں بولتا ہے۔  ‘ملک کے دوسرے سب سے بڑے سرکاری بینک پی این بی میں 11400 کروڑ روپے کی دھوکہ دھڑی کو لےکر اپنی خاموشی توڑتے ہوئے وزیر اعظم نے جمعہ کو مالی بدانتظامی میں شامل لوگوں کے خلاف کڑی کارروائی کا انتباہ دیا تھا اور کہا تھا کہ عوام کے پیسوں کی لوٹ کو برداشت نہیں کیا جائے‌گا۔

انہوں نے وزیر اعظم پر ہرسال ملک میں نوجوانوں کو دو کروڑ نوکریاں دینے کے انتخابی وعدے کو پورا کرنے میں ‘ ناکام ‘ رہنے کا بھی الزام لگایا۔راہل نے کہا کہ میک ان انڈیا، اسٹارٹ اپ انڈیا اور سٹینڈ-اپ انڈیا جیسی اسکیموں کے باوجود بھی، ‘ گھڑیوں سے لےکر شرٹ اور جوتوں تک آپ جو کچھ بھی خریدتے ہو، سب کچھ میڈ ان چائنا ہے۔  ‘

کانگریس رہنما نے کہا کہ پچھلے 70 سالوں کے دوران ہندوستان نے جو ترقی کی ہے، اس کی سب سے بڑی وجہ جمہوریت ہے۔انہوں نے کہا، ‘ ملک کے لوگوں، کانگریس پارٹی، امبیدکر نے ایک ساتھ مل‌کر اس ملک کو یہ آئین دیا۔  ‘انہوں نے کہا کہ برٹن اور امریکہ میں تقریباً سو یا دو سو سال پہلے جمہوریت آئی تھی، ‘ لیکن کرناٹک نے 900 سال پہلے جمہوریت کے بارے میں دنیا کو سکھایا تھا۔  ‘راہل نے کہا، ‘ جب کوئی بی جے پی کارکن کسی قبائلی یا دلت یا اقلیت کمیونٹی کے کسی آدمی پر حملہ کرتا ہے تو وہ سماجی مصلح بسونّا، اکامہادیوی اور رانی چینمّا کے خلاف کام کر رہا ہوتا ہے۔  ‘

سنت اکامہادیوی 12ویں صدی کی شاعر اور سنت تھیں۔  رانی چینمّا کتّور کی رانی تھیں اور ان کو سال 1824 میں برٹش ایسٹ انڈیا کمپنی کے خلاف مسلح بغاوت کرنے کے لئے جانا جاتا ہے۔