’پردھان منتری کوشل وکاس یوجنا کے تحت چلنے والے سینٹر ہی بند ہیں تو روزگار کہاں سے پیدا ہوگا‘

دہلی میں Ministry of Skill Development کے دفتر کے باہر مظاہرہ کرنے والے مرکز کے منتظمین کا الزام ہے کہ حکومت نے سینٹر تو شروع کروا دیا، لیکن کام صرف بڑے بڑے صنعتی گھرانوں کو دے رہی ہے۔

نئی دہلی : پردھان منتری کوشل وکاس یوجنا (پی ایم کے وی وائی) کے تحت ملک بھر میں چلنے والے سینٹروں کو حکومت کام نہیں دے رہی ہے۔ بدھ کو دہلی میں  منسٹری آف اسکل ڈیولپمنٹ کے دفتر کے باہر سینکڑوں سینٹر ہولڈرز نے کام نہ ملنے اور پرانی  پیمنٹ نہ ملنے کی وجہ سے مظاہرہ کیا۔ مظاہرین  کا الزام ہے کہ حکومت نے سینٹر تو شروع کروا دیا، لیکن کام صرف بڑے بڑے صنعتی گھرانوں کو دے رہی ہے۔

پی ایم کے وی وائی  کا آغاز جولائی 2015 میں کیا گیا تھا۔ اس اسکیم کے تحت 2020 تک ایک کروڑ نوجوانوں کو ٹریننگ دینے کی اسکیم بنائی گئی تھی۔اس اسکیم میں تین مہینے، چھے مہینے اور ایک سال کے لئے رجسٹریشن ہوتا ہے۔ نصاب پورا کرنے کے بعد سرٹیفکٹ دیا جاتا ہے۔ یہ سرٹیفکٹ پورے ملک میں قابل قبول  ہوتا ہے۔ اس اسکیم کا مقصد ایسے لوگوں کو روزگار مہیّا کرانا ہے جو کم پڑھےلکھے ہیں یا بیچ میں اسکول چھوڑ دیتے ہیں۔

ملک کی چار ریاستوں (ہریانہ، راجستھان، اتر پردیش اور اتراکھنڈ) میں تقریباً 22 سینٹر چلانے والے رنکو بتاتے ہیں، ‘ ہم نے پچھلی فروری میں سینٹر شروع کیا تھا، لیکن تب سے لےکر ابھی تک صرف 60 سیٹ کا کام دیا گیا۔ ویسے سینٹر لیتے وقت کہا گیا تھا کہ ہر نصاب میں 120 سیٹ ہر تین مہینے پر دی جائیں‌گی، لیکن 15-17 مہینوں سے صرف 60 سیٹ کا کام ملا ہے، جس کے بھی پورے پیسے حکومت نے نہیں دئے ہیں۔ ‘

رنکو نے الزام لگایا ہے کہ حکومت کو جو سیٹ ایسے چھوٹے سینٹروں کو دینی تھی وہ دراصل بڑےبڑے صنعتی گھرانوں کو دے دی گئی ہیں۔انہوں نے آگے کہا، ‘ ایک سینٹر بنانے کے لئے 15-20 لاکھ روپے کا خرچ آتا ہے۔ سرکاری اصول کے مطابق سینٹر 1500 مربع فٹ ہونا چاہئے، اپاہج لوگوں  کے لئے رینپ اور الگ سے بیت الخلا ہونا چاہئے۔ سی سی ٹی وی کیمرا، جنریٹر، ائیرکنڈیشن کے ساتھ کئی سہولیات سینٹر میں ہونی چاہئے۔ اس کے علاوہ ہر طرح کے ملازم ہونا چاہئے، جو کم سے کم گریجویٹ ہوں۔ ‘رنکو بتاتے ہیں کہ ایک سینٹر کی تعمیر میں 15-20 لاکھ خرچ کے علاوہ ملازمین‎ کی تنخواہ کے لئے تقریباً دو لاکھ روپے لگتے ہیں۔ ایک طالب علم کے پیچھے سات-آٹھ ہزار ملتے ہیں وہ بھی تب، جب اس کو نوکری کرتے تین مہینے ہو چکے ہوں‌گے، اس سے پہلے صرف 50-70 فیصد پیسہ ہی دیا جاتا ہے۔رنکو کا کہنا ہے کہ ملک بھر میں 10 ہزار سے زیادہ سینٹر بند پڑے ہیں، کیونکہ ان کے پاس کام نہیں ہے۔ استاد رکھنے کے لئے ٹی او ٹی نصاب کروانا پڑتا ہے، جس کے لئے 18000 روپے خرچ ہوتا ہے۔ کام نہیں ملے‌گا، تو استاد اور دیگر ملازمین‎ کو تنخواہ کہاں سے دیا جائے‌گا۔

راجستھان کے سیکر سے آئے ہری اوم یادو کا کہنا ہے، ‘ گزشتہ سال مئی مہینے میں سینٹر کی شروعات کی تھی، لیکن تب سے صرف ایک بار 60 طالب علموں کا کام ملا تھا، جس کا ابھی بھی 30 فیصد پیسہ دیا جانا باقی ہے۔ ہم کیا کریں، کہاں جائیں؟ جب پوچھتے ہیں تب بولتے ہیں کہ ابھی کام نہیں ہے۔ ہمارا اتنا پیسہ لگ گیا ہے اور کام نہیں مل رہا ہے۔ ابھی تک لاکھوں کا نقصان ہو گیا ہے۔ اس کی بھرپائی کون کرے‌گا۔ ایسا ہی چلتا رہا تو ہم لوگوں کو خودکشی کرنی ہوگی۔ ‘

جھجر سے آئے ترون بھی سینٹر چلا رہے ہیں۔ ان کا کہنا ہے، ‘ جب ہم نے سینٹر کی شروعات کی تھی تو ہر نصاب کے حساب سے 27000 روپے دئے گئے تھے۔ کوئی دو یا تین نصاب چلا رہا ہے۔ جس حساب سے کہا گیا تھا اس کے مطابق ہرسال دو نصاب میں 960 طالب علموں کی ٹریننگ کا کام ملنا چاہئے تھا، لیکن صرف 60 لوگوں کو ٹریننگ کا کام دیا گیا۔ سینٹر کی تفتیش کوالٹی کنٹرول آف انڈیا کرتی ہے اور ہم سب کے سینٹر کو چار اور پانچ اسٹار ملے ہوئے ہیں۔ اس کے باوجود کام نہیں مل رہا ہے۔ ‘

وہ آگے کہتے ہیں، ‘ حکومت نے عوام کو بیوقوف بنانے کا کام کیا۔ نوکری دلانے کی ذمہ داری بھی ہمارے پاس دی گئی ہے۔ نوکری ہوگی تو نہ ملے‌گی۔ حکومت نے کہاں روزگار پیدا کرنے کا کام کیا۔ ٹریننگ دینے کے لئے ہزاروں سیٹیں بڑی بڑی کمپنیوں کو دی گئی ہیں اور ان کے پاس 10-1  کمپنی چل رہی ہے، تو وہ اس طرح دکھا دیتے ہیں کہ تین مہینہ کا روزگار دیا گیا۔ یہ سب کام افسر اور صنعتی گھرانوں کی ملی بھگت سے ہو رہا ہے۔ ‘

پی ایم کے وی وائی کے دفتر کے باہر مظاہرہ کرتے سینٹر کے ناظم (فوٹو : پرشانت کنوجیا)

گزشتہ سال اگست مہینے میں بھی دہلی میں منسٹری آف پی ایم کے وی وائی کے دفتر کے باہر سینٹر کے منتظمین  نے مظاہرہ کیا تھا۔ اس وقت سینٹر شروع کرنے کے بعد سے ان کو کوئی کام نہیں ملا تھا۔ اس وقت افسروں نے فرضی سینٹروں کی وجہ سے  سارا کام بند کر دیا تھا، جس پر مظاہرین کا کہنا تھا کہ جس کے پاس کوالٹی کنٹرول آف انڈیا کا تصدیق نامہ ہے، اس کو تو کام ملنا چاہئے۔مظاہرہ کے کچھ دنوں بعد ہی ریاستی وزیر راجیو پرتاپ روڈی نے متعلقہ  وزارت سے استعفی دے دیا تھا۔ منتظمین کا کہنا ہے کہ روڈی کے استعفیٰ کے بعد سینٹر کے منتظمین کو 60 لوگوں کو ٹریننگ دینے کا کام دیا گیا اور اس کے بعد سے کچھ نہیں ملا ہے۔

آشیکا نے نوکری چھوڑ‌کر سینٹر شروع کرنے کا کام کیا تھا، لیکن اب وہ بھی بھاری قرض میں ہیں۔ وہ کہتی ہیں، ‘ سینٹر میں لوگ ایسے ہی نہیں آتے۔ ہم گھرگھر جاکر خواتین کو حوصلہ دیتے ہیں کہ آپ آئیے سینٹر میں ٹریننگ لےکر کام کیجئے اور اپنے پیروں پر کھڑے ہوئیے۔ ان کو تمام سہولیات دیتے ہیں، لیکن حکومت ہے جو نہ کام دیتی ہے اور نہ ہی کام پورے ہونے پر پیسے۔ سینٹر کی سب سے زیادہ ضرورت دیہی علاقوں میں ہے، جہاں تعلیم کی کمی ہے۔ وہاں کوئی اگر اس اسکیم کے تحت کچھ سیکھ لیتا ہے، تو کم سے کم اپنی فیملی کا پیٹ پا لے‌گا۔ حکومت کی نیت میں کھوٹ ہے۔ وہ صرف اس اسکیم کے تحت ملک کے عوام کو بیوقوف بنا رہی ہے۔ کوئی روزگار دینے کا کام نہیں ہو رہا ہے۔ ‘

وہ آگے کہتی ہیں، ‘ پی ایم کے وی وائی  کے دم پر ہی حکومت نے روزگار پیدا کرنے کا وعدہ کیا تھا۔ آپ سمجھ سکتے ہیں کہ جب سینٹر ہی بند ہے تو روزگار کہاں سے پیدا ہوگا۔ کیونکہ کسی بھی روزگار میں جانے کے لئے کام آنا چاہئے۔ 2020 تک 12000 کروڑ کا بجٹ ہے، وہ سب افسروں کی ملی بھگت کی وجہ سے ایسے ہی ختم ہو جائے‌گا، جس کا زمین پر کوئی اثر نہیں دکھے‌گا۔ ‘

ہم نے اس سلسلے میں متعلقہ  وزارت سے ای میل کے ذریعے رابطہ کیا، لیکن اسٹوری چھپنے تک ان کی طرف سے کوئی جواب نہیں آیا۔