وزارت داخلہ نے لوک سبھا میں کہا کہ جموں و کشمیر کا خصوصی درجہ ختم کرنے کے بعد پتھربازی کے واقعات میں کمی آئی ہے۔ حالانکہ، اعداد و شمار بتاتے ہیں کہ جنوری سے 4 اگست تک اوسطاً ہر مہینے پتھربازی کے 50 واقعات ہوئے۔وہیں 5 اگست کے بعد ایسے معاملے اوسطاً ہر مہینے بڑھکر 55 ہو گئے۔
مرکزی وزیر داخلہ امت شاہ (فوٹو : پی ٹی آئی)
نئی دہلی: وزیر داخلہ امت شاہ نے بدھ کو راجیہ سبھا میں کہا کہ جموں و کشمیر کا خصوصی ریاست کا درجہ ہٹائے جانے کے بعد پولیس کی گولی سے ایک بھی آدمی کی جان نہیں گئی ہے اور مقامی انتظامیہ کے ذریعے مناسب حالات پائے جانے کے بعد وہاں جلدہی انٹرنیٹ خدمات بحال کر دی جائےگی۔ شاہ نے یہ بھی کہا کہ جموں و کشمیر میں سبھی اخباروں کی اشاعت ہو رہی ہے اور ٹی وی چینل کام کر رہے ہیں اور اخباروں کی تقسیم میں کوئی کمی نہیں آئی ہے۔
وقفہ سوال کے دوران شاہ نے کشمیر کے حالات کے بارے میں پوچھے گئے سوالوں کے جواب میں کہا کہ پانچ اگست کو جموں و کشمیر میں، خصوصی ریاست کا درجہ ہٹائے جانے کے بعد پولیس کی گولی باری میں کسی کی جان نہیں گئی۔ ایوان بالا میں وزیر داخلہ نے کہا، ‘ وہاں حالات ہمیشہ سے ہی معمول پر ہیں۔ دنیا بھر میں کئی طرح کی باتیں چل رہی ہیں۔ وہاں حالات پوری طرح معمول پر ہے۔ پانچ اگست کے بعد پولیس کی گولی باری میں ایک بھی آدمی کی جان نہیں گئی۔ حالانکہ کئی لوگوں کو خدشہ تھا کہ وہاں خون خرابا ہوگا اور لوگوں کی جان جا سکتی ہے۔ ‘ انہوں نے کہا کہ اس سال پتھربازی کے واقعات میں کمی آئی ہے، جو کہ گزشتہ سال کے مقابلے میں 802 سے گھٹکر اس سال 544 ہو گئی ہے۔
انڈین ایکسپریس کے مطابق، اس سے پہلے منگل کو راجستھان کے بی جے پی رکن پارلیامان کنک مل کٹارا کے سوال کا تحریری جواب دیتے ہوئے مرکزی وزیر کشن ریڈی نے لوک سبھا میں کہا تھا، ‘ 5 اگست 2019 سے 15 نومبر 2019 تک پتھربازی یا لاء اینڈ آرڈر سے جڑے 190 معاملوں میں 765 لوگوں کو گرفتار کیا گیا۔ 1 جنوری، 2019 سے 4 اگست، 2019 تک ایسے 361 معاملے درج کئے گئے ہیں۔ ‘
ان گرفتاریوں میں ان کو شامل نہیں کیا گیا ہے جن کو 5 اگست کے بعد سی آر پی سی اور پبلک سیفٹی ایکٹ (پی ایس اے) کے تحت حراست میں رکھا گیا ہے۔ جموں و کشمیر کا خصوصی درجہ ختم کرنے کے بعد پتھربازی کے واقعات میں کمی آنے کے کٹارا کے سوالوں کا جواب دیتے ہوئے ریڈی نے کہا تھا کہ ہاں، کمی آئی ہے۔
حالانکہ، اعداد و شمار کے تجزیے سے پتہ چلتا ہے کہ جنوری سے 4 اگست تک اوسطاً ہر مہینے پتھربازی کے 50 واقعات ہوئے۔ وہیں، 5 اگست کے بعد ایسے معاملے اوسطاً ہر مہینے بڑھکر 55 ہو گئے۔ اس سے پہلے، آرٹیکل 370 پر اپنے فیصلے کے بعد حکومت نے کسی احتجاج یا پبلک آرڈر میں رکاوٹ سے انکار کیا تھا۔
بدھ کو جی کشن ریڈی نے راجیہ سبھا میں ایک بیان میں کہا کہ آرٹیکل 370 کے تحت جموں و کشمیر کا خصوصی ریاست کا درجہ ختم کئے جانے سے ایک دن پہلے 4 اگست سے کشمیر وادی میں رہنماؤں، علیحدگی پسندوں اور پتھربازوں سمیت 5161 لوگوں کی گرفتاریاں ہوئی ہیں۔ اس میں سے 218 پتھربازوں کے ساتھ 609 لوگوں کو فی الحال حراست میں رکھا گیا ہے۔
(خبر رساں ایجنسی بھاشا کے ان پٹ کے ساتھ)
Categories: خبریں